Түркістан облысында жаппай төбелес: полицейлер күдіктілерді ұстады

Түркістан облысының полицейлері Атакент ауылында болған айуандық жаппай төбелестен кейін бірнеше адамды ұстап, қылмыстық істі тергеп жатыр, деп хабарлайды Orda.kz.

Түркістан облыстық полиция департаментінің ақпаратына сәйкес, қанды қырғынға ұйытқы болғандар мен қатысушылар ұсталды. Құқық қорғау органдары қанша адамның күдікке ілінгенін әзірге нақтылаған жоқ.

«Түркістан облысының полицейлері Мақтарал ауданындағы ауылдардың бірінде бір топ жастардың бұзақылық әрекетінің жолын кесті. Күдіктілер қамауға алынды. Қылмыстық іс қозғалды» деп хабарлады облыстық полиция департаментінің баспасөз қызметі.

Қазір полицейлер оқиғаның барлық мән-жайын анықтап жатыр.

Ғаламторда 7 мамыр күні кешке Атакент ауылында болған аяусыз жаппай төбелес кадрлары пайда болды. Куәгерлердің айтуынша, кикілжіңге Өзбекстанмен шекарадағы жүк көлігін өткізу бекетіндегі бопсалау себеп болуы мүмкін.