Тұз сатқыштар атақты Көбейтұз көліне қауіп төндіріп отыр

Еліміздегі кеңінен танымал ерекше су айдыны — Көбейтұз көлінде жаппай рейд жүреді, деп хабарлайды Orda.kz.

Туристер көлдің түбінен қызғылт тұз жинап, оны интернетте бір келісін бес мың теңгеге дейін бағалап, сатады. Бұл көлдің бірегей экожүйесіне айтарлықтай зиян келтіріп жатқаны сөзсіз.

КТК телеарнасының хабарлауынша, адамдар мұны жасырын емес, бейнекамераға түсіріп,  ашық түрде істеп жүр.

«Апта ішінде тұз жинағандар тағы да бейнежазбаға түсіп қалды. Қазір оларды айыппұл салу үшін полиция іздеп жатыр. Экология министрлігі жағдайды бақылауға алды. Шенеуніктерді мазалайтыны — тұз жинайтындарды ескерту белгілері де, бейнебақылау да тоқтатып жатқан жоқ» деп жазылған хабарламада. 

Көбейтұз көлі — ағынсыз тұзды көл. Аумағы — 690 гектар, тереңдігі — 1,5 метрге дейін. Көл Ақмола облысының Ерейментау ауданында орналасқан.

Көбейтұз —  ерекше көл тіпті Қазақстаннан тыс жерлерде де танымал. Әр бірнеше жыл сайын мұндағы су құрамындағы сирек кездесетін балдырлар әсерінен қызғылт түске боялады.

2021 жылы Facebook қолданушылары көлдің кеуіп қалған суреттерін жариялаған. Бұл жұрт арасында алаңдаушылық туғызды. Жауап ретінде аудан әкімінің орынбасары мұның қалыпты табиғи құбылыс екенін айтқан болатын.