Тұрсынбек Қабатов ұшақта тәртіп бұзғаны үшін бес тәулікке қамауға алынды

Елорданың әкімшілік сотының шешімімен белгілі әзілкеш Тұрсынбек Қабатов ұсақ бұзақылық жасағаны үшін жауапқа тартылды.

Бұл туралы Астана қалалық әкімшілік құқық бұзушылық істер жөніндегі мамандандырылған ауданаралық соты хабарлайды.

Ұшақ бортында Қабатов мас күйінде әдепсіз сөздер айтқан. Сот отырысында ол қызметке көңілі толмайтынын айтып, жасаған әрекеті үшін кешірім сұрағанымен, айтылған сөздері есінде қалмағанын атап өтті.

Аға стюардесса сот отырысына куәгер ретінде қатысып, әзілкештің мас күйінде балағат сөздер айтқанын растады. Айғақтарынан басқа, Қабатовтың кінәсі оның полицияға тапсыру актісімен, бейнежазбамен және медициналық сараптама нәтижелерімен расталды.

Әзілкеш бес тәулікке әкімшілік қамауға алынды. Сот ұйғарымы заңды күшіне енген жоқ және оған шағым жасауға болады.