Трендтен таяққа: Павлодарда мұғалім оқушыны ұрды

Павлодарда TikTok-қа тренд түсірем деген оқушы мұғалімнен соққы алды, деп хабарлайды Orda.kz.

Әлеуметтік желіде Павлодардағы мектептердің бірінде мұғалім оқушыны соққыға алған видеосы тарады. Бейнероликте оқушы сабақ үстінде орнынан тұрып, кейін орындықтың үстіне шығып түсініксіз сөздер сөйлеген. Ашуға булыққан мұғалім оқушыны орнына отырғызу үшін кеудесінен ұрған.

Павлодар қаласының білім бөлімінің мәліметінше оқушы достарымен бәстескен. Сабақ үстінде орындық үстіне шығып алып, мұғалімнің ескертуіне қарамастан Тик-Токтағы трендті қайталағысы келген. Салдарынан физика пәнінің мұғалімі оқушыға күш қолданған.

Болған оқиғадан кейін мектеп әкімшілігі мұғаліммен келісім-шартты бірден бұзғаны хабарланды. Оқушылармен әңгіме жүргізіліп, оқушы тарапынан және оның ата-анасынан ешқандай да шағым жоқ екені белгілі болды.