Трамп журналистер алдында мәлімдеме жасады: «Мадуроның билігі аяқталды, ол енді президент емес»

Ақ үй басшысы Венесуэладағы жағдайға байланысты баспасөзге арнап мәлімдеме жасады, деп хабарлайды Orda.kz. Америка президенті айтқан сөздерінің негізгі тезистерін ұсынамыз.

• Операцияға «Түн ортасындағы балға» деген кодтық атау берілген. Ол «мінсіз өтті» және екінші дүниежүзілік соғыстан бергі баламасы жоқ операция болды.
• Мадуро мен оның жұбайы таңсәріде, қап-қараңғы уақытта, күн шықпай тұрып қолға түсті.
• «Біз бүкіл Каракастағы жарықты өшірдік». Енді олар АҚШ соты алдында жауап береді.
• АҚШ Мадуроның бақылауында болған, елге жеткізілетін есірткінің 97 пайызын тоқтатты. Ол Cartel de los Soles есірткі картелін жеке өзі басқарған, соның салдарынан мыңдаған америкалық қаза тапты.
• Мадуроның билігі аяқталды, ол енді Венесуэланың президенті емес.
  Билік берілгенге дейін елді АҚШ басқарады.
• Қажет болған жағдайда америкалық әскерилер екінші соққы беруге дайын, ол одан да ауқымды болады. «Біз дайынбыз».
• АҚШ-тың басты мақсаты — Венесуэла халқын бай, тәуелсіз және қауіпсіз ету. Бұл шабуыл игі мақсаттарға жету үшін жасалды.
• Мадуромен болған жағдай кез келген адаммен қайталануы мүмкін.
  Венесуэла мұнайына салынған америкалық эмбарго өз күшінде қалады.
• АҚШ Венесуэлада мұнай өнеркәсібін құрды, алайда венесуэлалық режим оны ұрлап, Вашингтон миллиардтаған доллардан айырылды.

Баспасөз конференциясының алдында Трамп өзінің әлеуметтік желісінде Венесуэла басшысының АҚШ-тың «Иводзима» әскери кемесінде тұтқындалған сәтінен фото жариялады.

Суретте Мадуроның қолы кісенделген, көзін бүркемелеген. Дыбысты естімеу үшін оған құлаққап кигізілген.

Мадуро өткен түні Каракаста «Дельта»  жасағы қатысқан арнайы операция барысында ұсталды. Ол Нью-Йоркке жеткізіліп, тағылған айыптар бойынша АҚШ соты алдында жауап береді.

Қақтығыс жайлы толығырақ мына жерден оқи аласыз.