Тоқаев жылдар бойы жөнделіп бітпей жатқан жолдарды биыл біржола аяқтауды тапсырды

Президент Қасым-Жомарт Тоқаев 5-7 жылдан бері жөнделіп, бітпей жатқан республикалық маңызы бар  жолдарды биыл біржола аяқтауды тапсырды.

Президент үкіметтің кеңейтілген отырысында еліміздің көлік-логистикалық әлеуетін арттыру үшін белсенді жұмыс істеу қажет екенін айтты. Оның сөзінше, теміржол саласындағы өзекті мәселелерді шешу жолдарын қамтитын Бағдарламалық құжат қабылдау қажет. Вагондарды жаңарту жұмысын тездету керек. Контейнерлер тапшылығын жою қажет.

«Қазақстанды Еуразияның толыққанды көлік-логистикалық және транзиттік хабына айналдыру – алдымызда тұрған стратегиялық міндет. Осы міндетті іске асыру үшін Көлік министрлігі құрылды. Сондықтан, министрлік осы саладағы өзекті мәселелер бойынша шұғыл және тиімді шешімдер қабылдауы керек. Нақты нәтиже күтемін. Биыл бірінші жартыжылдықта теміржол саласындағы өзекті мәселелерді шешу жолдарын қамтитын Бағдарламалық құжат қабылдау қажет. Мәселе аз емес. Атап айтқанда, вагондарды жаңарту жұмысын тездету керек. Контейнерлердің тапшылығын жою қажет. Магистральды желілерді кеңейтуге қатысты барлық жобаларды жүзеге асыру қажет (2028 жылға қарай 1,3 мың шақырым). Жалпы, теміржол саласын қарқынды түрде цифрландыру керек. Бұл қадам оның тиімділігі мен өнімділігін едәуір арттыруға, бюджет қаражатын үнемдеуге мүмкіндік береді», - деді ол.

Тоқаев сонымен бірге еліміз үшін айырықша маңызды «Астана-Балқаш-Алматы» тас жолы әлі күнге дейін жөнделіп бітпей жатқанын сынады.

«Құрылыс 2017 жылдан бері жүріп жатыр. Республикалық маңызы бар «Атырау-Астрахань», «Ақтөбе-Қандыағаш», «Талдықорған-Өскемен» жолдарының жөнделіп жатқанына 5 жылдан асты. Биыл осы жұмыстар біржола аяқталуы тиіс. Бұл жерде бірнеше мәселені ескеру қажет. Қалыптасқан тәжірибеге қарасақ, республикалық маңызы бар жолдардың тендерін көп жағдайда тек шетел компаниялары ұтып алады. Мұндай жобаларға қолынан іс келетін, тиісті техникамен жабдықталған өз кәсіпорындарымызды тарту керек. Сонымен қатар, жол құрылысына қажетті техниканы елімізде шығаруды дамытып, өзіміздің өнімді пайдалану керек. Жалпы, жол мәселесіне келгенде бір ғана мақсат болуы тиіс. Республикалық немесе аймақтық жол болсын, еліміздегі жолдың бәрі сапалы болуы керек. Әзірге жағдай мәз емес», - деді ол.