Тоқаев жаңа тағайындалған сыртқы істер министрі Ермек Көшербаевпен кездесті

Мемлекет басшысы жаңадан тағайындалған сыртқы істер министрі Ермек Көшербаевпен кездесті, деп хабарлайды Orda.kz.

Бүгін Мұрат Нұртілеудің орнына сыртқы істер министрі болып Ермек Көшербаев тағайындалған еді.

«Кездесуде Президент Қасым-Жомарт Тоқаев теңгерімді сыртқы саясатты одан әрі нығайту, ұлттық мүддемізді халықаралық аренада белсенді ілгерілету, экономикалық дипломатия мен инвестициялық серіктестікті күшейту бағытында нақты тапсырма берді. Мемлекет басшысы көпжақты форматтағы ықпалдастықты жандандыруға, сондай-ақ шетелде Қазақстан азаматтарының құқығы мен мүддесін қорғау жұмыстарының тиімділігін арттыруға ерекше назар аударды», деп мәлімдеді Ақорда. 

Айта кетейік,  Мұрат Әбуғалиұлы Нұртілеу ҚР президентінің халықаралық инвестиция және сауда ынтымақтастығы жөніндегі көмекшісі болып тағайындалды.