Тоқаев Ұлытауға көңіл айтты: Қаза тапқандардың отбасыларына 10 жылдық жалақы төленеді

Қасым-Жомарт Тоқаев Ұлытау облысындағы кеншілер өлімін мұқият тергеуді тапсырды. Сонымен қатар, кен орнында қаза тапқандардың отбасына он жылдық орташа жалақы мөлшерінде өтемақы төленеді, деп хабарлайды Orda.kz.

Президент Ұлытау облысындағы «Қазақмыс» корпорациясының кен орнында тау жынысының опырылуы салдарынан қаза тапқан жұмысшылардың туған-туыстарына көңіл айту жеделхатын жолдады.

Сонымен қатар, Тоқаев үкіметке төтенше жағдайдың себептерін жан-жақты тергеуді тапсырды. Тиісті ведомстволар мен өңір әкімдігіне қаза тапқандардың отбасына барлық қажетті көмек көрсетуді міндеттеді.

Ал «Қазақмыс» корпорациясы «Жомарт» кен орнында қаза тапқан жұмысшылардың отбасына ұжымдық келісімшартқа сәйкес барлық қажетті көмекті көрсетеді. Бұл туралы компания өкілдері хабарлады.

«Әлеуметтік және материалдық қолдау көрсету, сондай-ақ моральдық шығынды өтеу мақсатында марқұмдардың отбасына он жылдық орташа жалақы мөлшерінде өтемақы төленеді. Сонымен қатар жерлеу рәсімін ұйымдастыруға 2 миллион теңгеден астам қаржы бөлінеді»,  деп мәлімдеді «Қазақмыс» компаниясы.

Сондай-ақ, асыраушысынан айырылу жағдайына байланысты ай сайынғы төлемдер, балалардың оқу ақысын төлеу, марқұмдардың несие және қарыздарын жабу сияқты көмек түрлері қарастырылған.