Тоқаев: «Тағдыршешті сәтке куә болдық»

Президент Қасым-Жомарт Тоқаев Конституцияның қабылдануына арналған салтанатты іс-шараға қатысты, деп хабарлайды Orda.kz.      

Ақордада өткен жиынға премьер-министр Олжас Бектенов, Парламент Сенатының төрағасы Мәулен Әшімбаев, Парламент Мәжілісінің төрағасы Ерлан Қошанов, Мемлекеттік кеңесші Ерлан Қарин, Президент Әкімшілігінің басшысы Айбек Дәдебай, Үкімет мүшелері, орталық мемлекеттік органдардың басшылары, облыс әкімдері, сондай-ақ Астана, Алматы және Шымкент қалаларының әкімдері қатысты.

Сонымен қатар іс-шараға Конституциялық комиссия мен Жалпыұлттық коалиция мүшелері де қатысты.

«Халық Конституциясы – стратегиялық сенім мандаты және ұзақмерзімді мақсаттар мен өрлеу жолына бастайтын жаңа қоғамдық келісім, –  деп атап өтті мемлекет басшысы.

Президенттің айтуынша, сондықтан еліміз дамудың жаңа кезеңіне қадам басты деп сеніммен айтуға болады. Соған сәйкес, мемлекет пен азаматтардың ықпалдастығы қайта жаңғыруы қажет. 

Өздеріңізге мәлім, былтыр қылмыстық жауапкершілікке тартылғандарға рақымшылық жасалды. Енді азаматтар мен мемлекеттің қауіпсіздігіне қатер төндірмейтін бірқатар қылмыстық және әкімшілік құқықбұзушылық бойынша тағы да рақымшылық жариялауға болады, –  деді Тоқаев. 

Елімізде әкімшілік істер бойынша рақымшылық алғаш рет жасалатынын атап өткім келеді. Парламент қазіргі сессияның соңына дейін тиісті заң қабылдауы керек. Бұл – Негізгі заңдағы адамгершілік идеалдары мен прогрессивті құндылықтарды қоғамда орнықтыратын маңызды қадам. 

«Жаңа Конституция – халқымыздың ынтымақ-бірлігінің жарқын символы. Оның баптарында әрбір қазақстандықтың арманы мен аңсары, ұрпағының баянды болашағына деген үміті мен сенімі көрініс тапқан» , – деді президент.

Президенттің айтуынша, Ата заң барша азаматтың – Отанымыздың шынайы патриоттарының басты бағдарына айналады. 

«Қазақстанның жаңа Конституциясы – әлемдік өркениеттің биігіне бет алған ұлтымыздың берік әрі мызғымыз тұғыры. Менің бұған ешқандай күмәнім жоқ. Сіздердің де шүбәларыңыз болмайды деп ойлаймын» , –   деп нақтылады мемлекет басшысы. 

Оқи отырыңыз:

• Қазақстанның жаңа Конституциясы референдумда ресми түрде мақұлданды
• Тоқаев қолданыстағы Конституцияны сынамауға шақырды
• Референдум қорытындысы: 87,15% қазақстандық жаңа Конституцияны қолдады