Тоқаев Сауд Арабиясы Королін Ұлттық мемлекеттік күнімен құттықтады

Мемлекет басшысы Қасым-Жомарт Тоқаев Қазақстан халқының және жеке өзінің атынан екі қасиетті мешіттің қамқоршысы Король Салман бен Абдулазиз Әл Саудты Сауд Арабиясының Ұлттық күнімен құттықтады.

«Бүгінде сіздердің елдеріңіз – саяси тұрақты, экономикасы дамыған мемлекет. Ол халықаралық қауымдастықтың құрметті мүшесі ретінде танылды және Таяу Шығыстағы басқа елдерге үлгі болып табылады. Сіздің басшылығыңызбен Корольдік одан әрі өркендеп, өз билігін нығайтуға тілектеспін» делінген жеделхатта. 

Қасым-Жомарт Тоқаев Сауд Арабиясы Қазақстанның Парсы шығанағындағы сенімді серіктесі екенін атап өтіп, дәстүрлі достық пен саяси диалогтың жоғары деңгейіне негізделген екіжақты қарым-қатынастардың одан әрі нығая түсетініне сенім білдірді.