Тоқаев санкциялық қарама-қайшылықты айыптап, кедергісіз сауданы қолдады

Мемлекет басшысы сындарлы дипломатияның, бейбітшілік пен ынтымақтастықтың өзара қолайлы формуласын табатын уақыты келгенін атап өтті.

Қасым-Жомарт Тоқаев Орталық Азия мемлекеттері басшыларының Германия канцлері Олаф Шольцпен кездесуі барысында санкциялық қарама-қайшылықты айыптап, шектеусіз және кедергісіз сауданы қолдады, деп хабарлайды мемлекет басшысының баспасөз қызметі.

«Қазақстан санкциялық қарсылыққа қарсы, өйткені саяси астарлы шектеулер халықаралық қатынастардың жалпы атмосферасын бұзады және мемлекеттер арасындағы сауда-экономикалық ынтымақтастықты дамытуға ықпал етпейді. Сонымен бірге, біз аймақтық саясатта санкциялық шектеулерді ескеруге мәжбүрміз. Біз сындарлы дипломатияның бейбітшілік пен ынтымақтастықтың өзара қолайлы формуласын табатын уақыты келді деп есептейміз», - деді Қазақстан Президенті. 

Қасым-Жомарт Тоқаев Қазақстан барлық мүдделі мемлекеттермен кедергісіз сауда мен инвестициялық ынтымақтастықты дамытуды жақтайтынын атап өтті.

«Мен құрметті канцлермен және жетекші неміс компанияларының басшыларымен экономикалық ынтымақтастық мәселелері бойынша нәтижелі келіссөздер жүргіздім. Біз мұндай ынтымақтастықтың болашағы жарқын деп есептейміз», - деді Мемлекет басшысы.