Тоқаев Нұрайдың өлімінен кейін Шымкент полициясының жұмысына баға беруді тапсырды

Тоқаев Ұлттық құрылтайда сөйлеген сөзінде Шымкенттегі Нұрайдың өлімінен кейін полиция жұмысына баға беруді тапсырды, деп хабарлайды Orda.kz.

Шымкентте Нұрайдың қаза табуы қоғамда кең резонанс тудырды. Қайғылы оқиғада бойжеткенді пышақтап өлтірді деген күдікпен 28 жастағы ер адам ұсталып, уақытша ұстау изоляторына қамалды.

Марқұмның жақындарының айтуынша, күдікті ұзақ уақыт бойы Нұрайдың артынан қалмай жүрген көрінеді. Ол әлеуметтік желілер арқылы бақылап қана қоймай, қыздың оқу орнына да барған. Туыстарының сөзінше, Нұрай қауіптеніп жүргенін бірнеше рет айтқан, өзіне келген хабарламаларды дәлел ретінде сақтаған. Бейресми ақпаратқа қарағанда, марқұмның 11 жеріне пышақ сұғылған. Бетін тіліп тастаған.

Оқиғаға мемлекет басшысы Қасым-Жомарт Тоқаев пікір білдірді. Ұлттық құрылтайда сөйлеген сөзінде президент Нұрайдың қазасы қоғамды алаңдатқанын атап өтті.

«Күдіктінің қызды аңдып, қорқытқаны белгілі болды. Бұл қайғылы жағдайға әкелді. Мен Шымкент қалалық полиция департаментінің әрекетіне құқықтық баға беруді Ішкі істер министрлігіне тапсырдым», — деді Тоқаев.

Президенттің айтуынша, істі жан-жақты тексеру үшін Бас прокурорға да тиісті тапсырма берілген.

Шымкентте 11 жерінен пышақталған марқұмның денесін туысқандары туған жері Төрткөл ауылына алып кетті. Олар күдікті тиісті жазасын алса дейді.