Тоқаев медицина қызметкерлеріне шабуылдағандарға жазаны күшейтуді тапсырды

Мемлекет басшысы медициналық қоғамдастықтың және белсенді азаматтардың медицина қызметкерлеріне шабуыл жасағаны және қатыгездік көрсеткені үшін жауапкершілікті қатаңдату ұсынысын қолдады, деп хабарлайды Orda.kz.

Бұл туралы парламент депутаттары, денсаулық сақтау саласы өкілдері және белсенді азаматтар ұсыныс тастаған болатын. 

«Дәрігерлердің денсаулығына нұқсан келтіріп, өміріне қауіп төндіретін мұндай келеңсіздіктерге «Заң және тәртіп» қағидатына сәйкес құқықтық тұрғыда батыл түрде тосқауыл қойылуы керек» деп жазды президент кеңесшісі Руслан Желдібай. 

Мемлекет басшысы кеңесшісінің айтуынша, бұл бастама парламентте азаматтық қоғам өкілдерімен бірге талқыланады.

Еске сала кетейік, Қостанай облыстық ауруханасында хирург ауыр жарақатпен жансақтау бөліміне түсті. Дәрігерге медициналық мекемеге келген ер адам шабуыл жасаған болатын.