Тоқаев елшілерді ауыстырды

Президент Қасым-Жомарт Тоқаев Қазақстан елшілерін ауыстырып жатыр, деп хабарлайды Orda.kz.

Мемлекет басшысы 23 мамыр күні Қазақстанның шетелде жүрген елшілерін ауыстырды.

Кім келді, кім кетті?

• Нажмедин Мұхаметәліұлы Қазақстан Республикасының Біріккен Араб Әмірліктеріндегі Төтенше және Өкілетті Елшісі лауазымынан босатылып, оның орнына Рауан Жұмабек тағайындалды.
• Барлыбай Садықов Эфиопия Федеративтік Демократиялық Республикасындағы Төтенше және Өкілетті Елшісі лауазымынан босатылып, орнына Жалғас Әділбаев тағайындалды. Ал Барлыбай Садықовтың өзі Кения Республикасындағы Төтенше және Өкілетті Елшісі, Найроби қаласындағы Біріккен Ұлттар Ұйымының бөлімшесі жанындағы Қазақстан Республикасының Тұрақты өкілі қызметін қоса атқарушы болып тағайындалды.
• Түркия Республикасындағы Төтенше және Өкілетті елшісі Еркебұлан Сәпиев Қазақстан Республикасының Түркі мемлекеттері ұйымы жанындағы Тұрақты өкілі қызметін қоса атқарушы лауазымына тағайындалды.

Еске сала кетейік, Вашингтонда Ақ үйден 2 шақырым жерде орналасқан мұражайда Израиль елшілігінің 2 өкілін атып кеткен болатын. Осы жағдайдан кейін Израиль премьер-министрі Беньямин Нетаньяху Израильдің бүкіл әлемдегі елшіліктеріндегі қауіпсіздік шараларын күшейтуді тапсырды. Ал «Орда» тілшілері осы оқиға аясында ҚР дипломатиялық қызметіне сауал жібергенде, дипломатиялық қызмет қорғау жайлы сұраққа бұл ақпараттың құпия екенін ескертіп, еш жауап бермеді.