Тоқаев: Бюджет қаражатына ғана иек артып отыратын «масылдықтан» арылу қажет

Президент Қасым-Жомарт Тоқаев барлық деңгейдегі мәслихат депутаттары форумында сөйлеген сөзінде әкімдіктердегі «масылдық» туралы пікір білдірді, деп хабарлайды  Orda.kz Ақордаға сілтеме жасап.

«Әкімдіктер жанындағы бюджеттік комиссиялардың құрамына білімді, беделді мәслихат депутаттарын енгізу қажет. Осылайша жұмыстың сапасын арттырып, қаржының тиімді жұмсалуын бақылауға болады. Қомақты қаражатты орынсыз шашып, пайдасыз бастамаларға жұмсауды тоқтату керек. Әкімдер республикалық бюджеттен берілетін дотацияға ғана иек артпауы тиіс. Масылдық күйден біржола арылу қажет», — деді Мемлекет басшысы. 

Оның айтуынша, жергілікті билік өкілдері табысты арттыру бағытында белсенді жұмыс істеуі керек.

«Бюджетке қатысты шешімдер мынадай негізгі сұрақтарға жауап беруі тиіс: қанша жұмыс орны ашылады, жеке инвестицияның қанша көлемі тартылады, бизнесті дамытуға қандай жағдай жасалады, қанша салық төленеді? Маңыздысын басқасынан дан ажырата білу қажет. Бұл дегеніміз — барлық деңгейдегі әкімдер мен мәслихат депутаттары бір командаға бірігіп, ең алдымен мемлекеттің мүддесіне қызмет етуі тиіс», — деді Тоқаев. 

Президенттің айтуынша, барлық өңірлердегі мәслихаттар мен әкімдіктер бюджеттегі әрбір теңгенің ел игілігіне жұмсалуын бірлесіп қамтамасыз етуге міндетті.

Оқи отырыңыз: 

• Тоқаев Түркістан облысының әкімі Нұралхан Көшеровті қабылдады
• Тоқаев Таяу Шығыстағы жағдайды ушықтырмауға шақырды
• Тоқаев Ираннан БАӘ-ге жасалған зымыран шабуылдарын айыптады