"Тобырлық деңгей" депутат Нұртөре Жүсіп қазақстандықтарды сынға алды

Сенат депутаты Нұртөре Жүсіп Қазақстан халқын мәдениетсіздік пен білім саласындағы олқылықтар үшін сөкті.

Ол премьер-министрге жолдаған сауалында халықтың мәдени деңгейіне қатысты проблема көтеріп, отбасындағы тәрбиеге де тоқталды.

«Дәл жаңа жылдың алдында шоколад шыршасын бір минутта жайпап кеткендерді де көрдік. Осы видеолар халықаралық пабликтерде мыңдаған қаралым жинап жатыр. Сонда біздің мәдени деңгейіміз, жеткен жеріміз осы ма? Мұндай масқара оқиғалардың себебіне үңіліп көрдік пе? Аш дейін десеңіз, аш емес, тоқ дейін десеңіз, тобырлық деңгей мынау. Бүгінгідей тоқшылық заманда осыншама тоғышарлыққа бой алдыратындай күйге неге түстік?» деді сенат депутаты.