Теміртауда зейнеткерді қорлаған жасөспірімдерді ұрып-соқты

Теміртау қаласында кәмелетке толмағандар жалғызбасты қарттың үйіне баса-көктеп кіріп, оны аяусыз ұрып, мазақтағаны үшін құрықталған жасөспірімдерді полиция ұстағанға дейін өзге біреулер соққыға жыққаны белгілі болды, деп хабарлайды Orda.kz.

Полиция бұл факті бойынша қылмыстық іс қозғады. Еске сала кетейік, Теміртауда зейнеткерді мазақ еткен 5 жасөспірім ұсталды. Кәмелетке толмаған күдіктілер қарт адамның пәтеріне алдап кіріп, төсекте жатқан қарияны ұрып-соғып, басынан теуіп, бетіне түкірген. Аталған дерек бойынша 191-бабының 3-бөлігіне сәйкес қылмыстық іс қозғалды. Ұсталғандар қазір тергеу изоляторында қамауда отыр.

Кейінірек қылмыс жасалғаннан кейін көп ұзамай жасөспірімдерге басқа кәмелетке толмағандар шабуыл жасағаны белгілі болды.  

«Екі күдікті басқа жасөспірімдердің шабуылына ұшырады. Аталған факт бойынша «денсаулыққа қасақана зиян келтіру» бабы бойынша қылмыстық іс қозғалды. Қазіргі таңда кәмелетке толмағандар ұсталып, полицияға жеткізіліп, профилактикалық есепке қойылды», деп мәлімдеді Қарағанды облысының полиция департаменті. 

Сонымен қатар, полиция құқық бұзушылардың заңды өкілдерін тиісті тәрбие бермегені үшін жауапқа тартатынын да мәлімдеді.