«Тамақты қарызға аламыз»: Ақтөбеде аудан әкімдігі 100-ден аса қызметкерге жалақы төлемеді

Ақтөбе облысы Шалқар ауданында «Ұлы Борсық» коммуналдық мекемесінің жүзден аса қызметкері жалақы ала алмай отыр. Жұмысшылар президент пен ұлттық қауіпсіздік қызметіне үндеу жолдады, деп хабарлайды Orda.kz.

«Ұлы Борсық» коммуналдық мекемесінің бір топ қызметкері бейнеүндеу жасады. Айтуларынша, мекеме жұмысшылардың еңбекақысын уақытында төлемеген.

«Жалақымыз үнемі 1-1,5 ай кешігіп түседі. Зейнетақы қорына және медициналық сақтандыруға 7-8 айлап ақша аударылмайды. Еңбек демалысының ақшасын уақытында алмаймыз. 2019 жылы жалақы көтерілді. Бірақ сол ақша жұмысшыларға төленбеді. Аудит тексеріс жүргізді. 190 млн теңге болатын заң бұзушылық жасағанын естідік. Бірақ белгісіз себептермен аяқсыз қалды. Жұмысшыларға зиянды жұмыс үшін сүт, киім берілмейді. Кәсіподақ тарапынан көмек жоқ. Біз көп жылдар бойы жасалып келген заң бұзушылықтарды қалпына келтіруді сұраймыз. Мекемеге тексеріс жіберілсін», — деді жұмысшылар үндеуде. 

Уақытында жалақы алмаған қызметкерлер тамақты қарызға алып жүргендерін айтты. Араларында көпбалалы отбасылар бар.

«Осы мекемеде 10 жылдан бері істеймін. Әрдайым жалақыны 1 айға кешіктіріп береді. Оны да уақытында емес. Медициналық сақтандыруға ақша ұстайды, бірақ аудармайды. «Ақша түспеді» деп дәрігер қабылдамайды. Қазір біріміздің несиеміз бәр. Уақытында төленбей тұр. Үш балам бар, әйелім төртінші балаға жүкті. Кішкентай ақшаның уақытында түспегені қиын. Қазір бәріміз тамақты дүкеннен қарызға алып отырмыз», — деді жұмысшы Серік Ахметов. 

Аудан әкімдігінің мәліметінше, «Ұлы Борсық» коммуналдық мекемесі Шалқар аудандық тұрғын үй-коммуналдық шаруашылығы, жолаушылар көлігі және автомобиль жолдары бөліміне қарайды. Кәсіпорында 176 қызметкер бар.

2025 жылдың тамыз айында шілде айының еңбек ақысы және еңбек демалысы ақысы ішінара төленіпті.

«Қалған шілде айының жалақысы 5-10 қыркүйекте кәсіпорынға түсетін коммуналдық төлемдер есебінен толығымен төленетін болады. Тамыз айының жалақысы да қыркүйек айында төленеді. Кәсіпорын қызметкерлеріне сыйақы, кәсіпорынның экономикалық-қаржылық жағдайына байланысты төленбеуде. Себебі, кәсіпорын шығысы кірісіне қарағанда айтарлықтай жоғары», — деп түсіндірді Шалқар аудандық тұрғын 
үй-коммуналдық шаруашылығы, жолаушылар көлігі және автомобиль жолдары бөлімінің басшысы Әділбек Мұрат. 

Аудан әкімдігінің хабарлауынша, 2025 жылдың шілде айында жұмысшыларға киім-кешек сатып алынған. Қазіргі кезде таратылып жатыр. Бірақ жұмысшылар бейнеүндеуінде бұл туралы айтылған жоқ.

Автор: Ардақ Ерубаева