Талдықорған полициясының бұрынғы бастығының ісі: зорлау құрбаны сотқа шақырылды

Талдықорғанда Жетісу облысының 27 жастағы тұрғынын зорлады деп айыпталған бұрынғы полиция басшысы Марат Күштібаевқа қатысты сот процесі жалғасты.

Бұл туралы Orda.kz тілшісі хабарлайды.

Жәбірленуші Талдықорған қалалық сотына куәлік беруге шақырылды. Істі судья Әлібек Әбдіхаев қарап жатыр.

Естеріңізге сала кетейік, алдыңғы сот отырысы сотталушының денсаулығына байланысты үзілген болатын. Ол сот залынан тікелей жедел жәрдеммен облыстық кардиологиялық орталыққа жеткізілді. Күштібаевқа тұрақсыз стенокардия, созылмалы жүрек жеткіліксіздігі диагнозы қойылды. Алайда, сол күні кешке Талдықорған қалалық көпсалалы ауруханасына жеткізіліп, екі күн жатып, уақытша ұстау абақтысына қайтады.

Құқық қорғау органдарындағы ақпарат көздері бұрынғы полиция бастығы қашып кетуі мүмкін деп қорқатындарын айтты. Сондықтан сотталушы жатқан ауруханада қауіпсіздік шаралары күшейтілді: арнайы жасақ барлық қабаттарға дерлік орналастырылды.

Полиция басшысы Марат Күштібаев былтыр қарашада ұсталған болатын. Жетісу облыстық полиция бөліміне 27 жастағы бойжеткен зорлау фактісі бойынша арызданған. Жәбірленушінің айтуынша, Күштібаев оны кеңседе жыныстық қатынасқа түсуге мәжбүрлеген.

Осы жанжалдан кейін облыстық басқарма басшысы Атығай Арыстанов қызметінен айырылды.