Талдыкөлден су тартқан Алматы әкімінің бауырлары жазалана ма?

Су ресурстары және ирригация министрі Нұржан Нұржігітов Алматы әкімінің бауырларымен байланысы бар SAT NS компаниясына қатысты тексеру жайында журналистердің сұрақтарына жауап берді, деп хабарлайды Orda.kz.

Су жобаларының іске асырылуы мен болуы мүмкін заң бұзушылықтарға байланысты тексеріс жүріп жатыр. Бұл туралы билік өкілдері мәлімдеді.

«Қазір тексеру шаралары жүргізіліп жатыр. Ол біткен соң сіздерге хабарлаймыз. Мұндай тексерісті бір-екі күнде аяқтау мүмкін емес. Өте көп процедуралар бар. Аяқталған кезде ресми жауап береміз», — деді жауапты тұлғалар.

Журналистер заң бұзушылықтар анықталса, не болатынын сұрағанда, экология және табиғи ресурстар министрі Нұржігітов міндетті түрде жаза қолданылатынын мәлімдеді.

«Әкімшілік кодекске және Су кодексіне суды пайдаланушылардың жауапкершілігін күшейтетін өзгерістер енгізілген. Айыппұлдар өскен, әсіресе ірі субъектілер үшін бұл қатты сезіледі. Егер заң бұзушылық расталса, әкімшілік жауапкершілік қарастырылады. Ал егер заң бұзушылық аса ауыр болса, қылмыстық іс те қозғалуы мүмкін», — деп жауап берді Нұржігітов.

Сонымен бірге, биліктің Кіші Талдыкөлді құрғату әрекеттеріне қарамастан, 2025 жылы көлге су қайта жиналды. Онымен бірге масалар, қоқыс пен сасық иіс те «оралды». Тұрғындар ылғал мен антисанитария мәселесін айтып шағымданды. Ал уәде етілген саябақ әлі күнге дейін тек құжат жүзінде ғана «бар».

Билік Талдыкөлге миллиардтаған қаржы бөлуді тоқтатпады. Мысалы көлді «тазарту» үшін ғана 2027 жылға дейін 267 миллион теңге, ал жасыл желектерге жыл сайын 1,7 миллиард теңге бөлу қарастырылған. Алайда экологтар мен қала тұрғындары жылдар бойы көлді сақтап қалуды талап етіп келеді. Дегенмен көлдің қасындағы құрылыс жұмыстары тоқтамады.