Таиландтағы зілзалаға тап болған қазақстандықтар неден қауіптенеді?

«Цунами мен афтершоктардан қорқамыз» — Таиландтағы жер сілкінісіне тап болған қазақстандықтар өздерінің қорқыныштарымен бөлісті, деп хабарлайды Orda.kz.

Еске сала кетейік, күшті жер сілкінісі салдарынан Мьянма мен Таиландта қираулар болды. БАҚ мәліметінше, Бангкоктағы үйінділер астында 43 адам қалып қойған.  

«Орда» Таиландта жүрген Қазақстан азаматтарымен байланысқа шықты. Наурыз айында Пхукетке кеткен қазақстандық тұрғын аралда жағдайдың тұрақты екенін айтты.

Сәлем! Мен Пхукеттемін, бұл жағдай маған қатты әсер еткен жоқ. Бангкоктағы кадрлар, әрине, өте қорқынышты, әсіресе салынып жатқан зәулім ғимараттар қатты зақымданған. Бангкоктағы таныстарымды тез арада кондоминиумдардан эвакуациялады. Сілкіністер Чиангмайда, Бангкокта және Таиландтың әртүрлі провинцияларында сезілді. Ал мұнда, аралда, бәрі тыныш. Пхукет сейсмикалық белсенділігі төмен аймақта орналасқан. Табиғи апаттар қаупі жағынан бұл әлдеқайда қауіпсіз орын. 

Тағы бір қазақстандық қыз Мандалайда (Мьянманың ірі қаласы) және Бангкокта болған күшті сілкіністерден кейін өзі мен таныстары қатты алаңдағанын айтты.  

Эпицентр Мьянмада болды. Бангкокта екі рет қатты сілкінді. Астанада әуежайлардың жұмысы тоқтатылды, Пхукетте де солай. Енді адамдар цунами мен афтершоктардан қорқып отыр. Біз де қазір аралда тұрмыз. Интернет пен жарық сөніп қалуы мүмкін. Барлық гаджеттерді қуаттап қойдық, — деді қыз.  

Бірінші сұхбаттасушымыз цунами бұл өңірде жер сілкінісіне қарағанда әлдеқайда сирек кездесетін құбылыс екенін атап өтті. Оның айтуынша, Таиланд үкіметі бақылау және ескерту жүйесіне едәуір қаржы жұмсаған — билік жағдайды қадағалап отыр.