Су тасқынынан зардап шеккендерге арналған 2576 үй құрылысы аяқталды — Шарлапаев

Қазақстанда су тасқынынан зардап шеккендерге арналған 2576 үйдің құрылысы аяқталды, деп хабарлайды Orda.kz.

Бүгінгі үкімет отырысында өнеркәсіп және құрылыс министрі Қанат Шарлапаев су тасқынынан зардап шеккен қазақстандықтарға арналған 2576 үйдің құрылысы аяқталғанын хабарлады. Оларды салу жұмыстары мамыр айының соңында басталып, 4 ай ішінде аяқталды.

«Солтүстік Қазақстан, Ақтөбе, Қостанай және Атырау облыстарында су тасқынынан зардап шеккендерге арналған үйлердің құрылысы 100% аяқталды. Құрылыс жұмысы Ақмола (38 үй) және Батыс Қазақстан өңірлерінде (66 үй) жалғасып жатыр», — деп хабарлады Шарлапаев.

Сондай-ақ, ол жаңа үйлерді қыркүйек айының соңында тапсыру жоспарланып отырғанын мәлімдеді.

Көктемгі су тасқыны салдарынан Қазақстанда барлығы 17 603 үй зардап шекті, оның 8 447-сі кейіннен апатты деп танылды. Мемлекет жаңа үй салудан бөлек, қайталама нарықта 5 767  тұрғын үй сатып алды.