«Су тасқынынан зардап шеккендер»: Премьер-министр Тоқаевпен жолықты

Президент Қасым-Жомарт Тоқаев Премьер-Министрді қабылдады, деп хабарлады Orda.kz.

Олжас Бектенов еліміздің әлеуметтік-экономикалық жағдайы, егін орағы және су тасқынынан зардап шеккен өңірлердегі тұрғын үйлерді қалпына келтіру жұмыстары туралы баяндады:

«Биыл өңдеу өнеркәсібі және құрылыс саласы экономикалық дамудың негізгі факторына айналды. Ауыл шаруашылығында да айтарлықтай өсім бар. Еліміздегі негізгі дәнді дақылдар алқабының 4,5 миллион гектарға жуығы немесе 27 пайызы жиналған. Орта есеппен бір гектардан 15 центнер өнім алынып отыр. Шамамен 6,6 миллион тонна астық бастырылды. Бұл былтырғы көрсеткіштен 40 пайызға артық», — деді премьер-министр.

Оның сөзінше шаруашылықтарға арзандатылған дизель отынын жеткізу кестеге сай жүргізіліп жатыр. 

Сонымен қатар, Олжас Бектенов су тасқынынан зардап шеккен 7 463 отбасы жаңа қонысқа көшіп, 479 баспананың құрылысы аяқталуға жақын екенін айтты. Сондай-ақ, 9 171 отбасына жөндеу жұмыстары үшін өтемақы төленді.