Су тасқынынан елімізде 8 мыңнан астам мал қырылды

Су тасқыны болған аймақтарда дәл қазір 8,1 мың мал қырылды, деп хабарлайды Orda.kz порталы.

Малынан айырылғандар өтемақы алады. Бұл туралы ақпаратты Ауыл шаруашылығының ресми өкілі Тілебалдин өткен брифингте растаған болатын.

«Жедел деректер бойынша өлген мал саны 8,1 мың бас, оның ішінде ұсақ мал – 6 мың, ірі қара – 1,5 мың, жылқы – 514 бас. Республикалық эпизоотияға қарсы отряд тұрақты эпизоотиялық жағдайды сақтау мақсатында жануарлардың өлекселерін жою жұмыстарын қарқынды жалғастыруда. Бүгінгі таңда 4,1 мың мал өлескелері жойылды. Премьер-министрдің тапсырмасы бойынша бұл жұмыс күшейтілген режимде жалғасатын болады. Су тасқынына қарсы іс-шараларды үйлестіру және су тасқыны кезеңі зардаптарын жою жөніндегі республикалық штабпен өлген мал иелеріне өтемақы төлеу алгоритмін әзірлеп, бекітілді. Меншік иелері мен залалды анықтау және басқа да мәселелерді шешу үшін өңірлерде жергілікті атқарушы органдармен шығынды анықтау жөніндегі комиссия құрылды», – деді Олжас Тілебалдин.

Мал иелері мәліметтерді көрсете отырып, жергілікті комиссияға өтініш беруі керек. Меншік құқығы комиссия актілерімен расталады. Ал меншік иелеріне өтемақы Ұлттық статистика бюросы жариялаған талапқа сай беріледі.