Спортшыларын Азия ойындарына жібермегені үшін Үндістан Қытайға наразылық білдірді

The Times of India басылымының жазуынша, Қытай Аруначал-Прадешті Қытайдың Оңтүстік Тибет аумағының бір бөлігі деп санайтындықтан, бірнеше спортшыға виза бермеген. Осы оқиғаға байланысты Үндістан Қытайға наразылық білдірді.

Спортшылар қыркүйектің 24-і мен 28-і аралығында Қытайдың Ханчжоу қаласында өтетін ХІХ Азия ойындары аясындағы у-шудан жарысқа қатысуы керек еді.

Үндістанның Сыртқы істер министрлігі мен Спорт министрлігіне спортшыларға Қытай визасын беруден бас тартылғаны туралы дереу хабарланды. Екі ведомство да бұл оқиғаны жайбарақат қабылдауға болмайды деп атады.

Үндістан Қытайға спортшы қыздарға виза бермегеніне наразылық білдірді.

«Үндістан үкіметі Қытай билігінің Аруначал-Прадеш штатындағы кейбір үнді спортшыларын аккредиттеуден және 19-шы Азия ойындарына жіберуден бас тарту арқылы оларды  әдейі кемсітіп отыр.

Ұзақ және дәйекті ұстаным ретінде Үндістан үндістандық азаматтарға олардың тұрғылықты жері немесе этникалық тегіне қарай бөліп-жарып қарауға үзілді-кесілді қарсы.

Аруначал-Прадеш Үндістанның ажырамас бөлігі болған және болып қала береді», - деді  Үндістан Сыртқы істер министрлігінің өкілі Ариндам Багчи.

Аруначал-Прадеш штаты Үндістан мен Қытай арасындағы аумақтық даудың нысанасы болып табылады.