Сотталғандарды азаптаған түрме қызметкерлерінің ісі сотқа жіберілді

Ұлытау өңірінде сотталғандарды азаптады деген күдікке ілінген қауіпсіздік қызметінің 11 қызметкеріне қатысты қылмыстық істі тергеу аяқталды.

Бұл туралы Қылмыстық-атқару жүйесі комитетінің баспасөз хатшысы хабарлады.

«Қорқыту және күш қолдану арқылы кемсіту мақсатында колонияның жеті қызметкері мен төрт әскери қызметкердің сотталғанға қатысты азаптау әрекетін жасағаны анықталды. Жасалған қылмыстық құқық бұзушылықтарды құқық қорғау органдарынан жасыру мақсатында шенеуніктер сотталғандардың мекеме және әскери бөлім қызметкерлеріне бағынбағаны туралы жоғары басшылыққа хабарлаған» делінген хабарламада.

Тергеу барысында күдіктілерге қатысты бұлтартпау шарасы таңдалып, тергеу сотының қаулысымен олар қызметтерінен уақытша шеттетілді.

26 наурызда қылмыстық іс сотқа жіберілді.