Сот жылдар бойы қудаланған желтоқсаншыны қуғын-сүргін құрбаны деп таныды

Сот Желтоқсан оқиғасына қатысқан ақтөбелік азаматты қуғын-сүргін құрбаны деп таныды, деп хабарлайды Orda.kz.

Ақтөбелік 64 жастағы тұрғын 1986 жылғы Желтоқсан оқиғасына қатысқаны үшін көрген қуғын-сүргінін ресми түрде мойындатты.

Азамат 1984 жылы Гурьев облыстық партия комитеті мен Мақат локомотив депосы кәсіподақ ұйымының жолдамасымен Қазақ мемлекеттік университетінің дайындық бөліміне түсіп, бір жылдан кейін философия және экономика факультетінің студенті атанған.

Алайда 1986 жылғы Желтоқсан оқиғасынан кейін, 18 желтоқсан күні, оны құқық қорғау органдары еш айып тақпастан ұстап әкеткен. Көп ұзамай ол университеттен шығарылып, партия қатарынан қуылады.

«Кейін босатылғанымен студент КОКП қатарынан шығарылып, қуғын-сүргінге ұшырап, жұмысқа тұра алмаған. Сол университеттің философия факультетін бітірген оның әйелі де осындай себептермен жұмысқа орналаса алмай, түрлі кедергілерге тап болған», – деп жазды сот.

2025 жылы азамат саяси қуғын-сүргінге ұшырағанын ресми мойындату үшін сотқа жүгінді. Істі қарау барысында сот оның расында да Желтоқсан оқиғасына қатысқанын және соның салдарынан еңбек құқықтарының бұзылғанын, қуғын-сүргінге ұшырағанын анықтады.

Еске сала кетейік, саяси қуғын-сүргін мен ашаршылық құрбандарын еске алу күні қарсаңында Қарағанды қаласында қоғам белсенділері Бақытжан Жансейітов пен Болатбек Тоқмырза ұсталып, 15 тәулікке әкімшілік қамауға алынған еді.