Сот қаңтар оқиғасы кезінде ұсталғандарды азаптау ісі бойынша 11 ҰҚК қызметкеріне үкім шығарды

Алматының Түрксіб аудандық соты қаңтар оқиғасы кезінде азаптауға қатысты деп айыпталған 11 ҰҚК қызметкеріне үкім шығарды, деп хабарлайды Orda.kz.

Екі қызметкерге ҚР Қылмыстық кодексінің 362-бабы «Билік немесе қызметтік өкілеттіктерді асыра пайдалану» бойынша, қалғандарына ҚР Қылмыстық кодексінің 146-бабы «Қатал, адамшылыққа жатпайтын немесе ар-намысты қорлайтын әрекеттер, азаптау» бойынша айып тағылды.

Сот үкіміне сәйкес:

• төрт сотталушы бес жылға бас бостандығынан айыру жазасын орташа режимдегі колонияда өтейді;

• үшеуі үш жылға орташа режимдегі колонияға жіберілді;

• ҰҚК-нің тағы үш бұрынғы қызметкері шартты түрде үш және бес жылға сотталды;

• бір сотталушы ақталды.

Олардың барлығына мемлекеттік қызметте жұмыс істеуге тыйым салынды, сонымен қатар атақтары мен медальдарынан айырылды.

Айта кетейік, бұл іс бойынша сот отырысы жабық есік жағдайында өтті. Сот отырысы басталмас бұрын Orda.kz тілшісіне үкімді жариялау жабық есік жағдайында өтетіні хабарланған болатын.

Бірнеше жәбірленушінің адвокаты Гүлнәр Жуасбаева сот үкімімен келіспейтіндерін, апелляциялық шағым түсірмек ниеттері барын айтты. Моральдық шығынды өндіру туралы талап-арыздар ішінара қанағаттандырылды.

«Адамдардың аз қатысуы үшін сот уақыты әдейі ауыстырылды. Сотта тек қарардың бір  бөлігі ғана оқылды. Үкім толық жарияланған жоқ. Марқұмның әйеліне  20 миллион теңге талап етілді, бірнеше жәбірленушінің әрқайсысы миллионнан, біреуі бес жүз мың теңге алды. Қалғандарына өтемақы төлеуден бас тартылды. Судья тек ұрып-соғуға аз қатысқандарға шартты жаза бергенін айтты» деп жазады Жуасбаева.

Адвокат сонымен қатар соттың аумақтық адвокаттар алқасына жеке ұйғарым шығарғанын хабарлады.

Қылмыстық іске барлығы 11 күдікті және 54 жәбірленуші қатысты. Еске салсақ, 2022 жылғы 6 қаңтарда Қазақстан Республикасы Ұлттық қауіпсіздік комитеті Төрағасының бұйрығымен елімізде террористік қауіптіліктің қызыл деңгейі енгізіліп, лаңкестікке қарсы операция белгіленді.

Қауіпсіздік күштеріне тәртіпті қалпына келтіру және қылмыстардың жолын кесу үшін шексіз өкілеттіктер берілді, олардың кейбіреулері осыны дұрыс  қолданбады. 

Атап айтқанда, олардың қатарында Алматы қаласы бойынша Ұлттық қауіпсіздік комитетінің барлау қызметінің түрлі басқармалары мен басқарма басшыларынан 11 лауазымды қызметкері бар. Прокурорлардың хабарлауынша, сол күні таңертең Қазақстан Республикасы Қарулы Күштерінің әскери қызметкерлері өз беттерінше халықаралық әуежай ғимаратына, қаланың төменгі бөлігінде болған жаппай тәртіпсіздік, терроризм және басқа да қылмыстық құқық бұзушылық оқиғаларға қатысты деген күдікпен ұсталғандарды түгелдей әкелген.

Комитет мүшелерінің назарын жеткізілген 54 азамат аударды. Олар әуе айлағы аумағында орналасқан контейнерлерге апарып, олардан өшпенділікпен жауап алына бастаған, дейді прокуратура. 

Айыптау қорытындысына сәйкес, аталған қызметкерлер күдіктілерді қорқытып, ұрып-соғып қана қоймай, қолдан жасалған құралдарды – АК-74 автоматы оқтарын, резеңке таяқтарды, тіпті бильярд таяқшасын да қолданған. Байғұстарға тағылған айыпты мойындауды талап етіп, естен танғанша ұрып-соғып, тепкілеген. Олардың кейбіреулерін зорлаймыз деп қорқытса, енді біреулерін еденді сүйіп, жалауға мәжбүрлеген.