Соңғы аптада ұн бағасы рекордтық деңгейге көтерілді

Елімізде соңғы аптада ұн бағасы рекордтық деңгейге көтерілді, деп хабарлайды Бірінші несие бюросының Data Hub жобасы.

«26 қыркүйек пен 3 қазан аралығында бірінші сұрыпты ұн бағасы 2%-ға өсті. Бұл 2022 жылдың мамыр айының ортасынан бергі ең жоғары мөлшерлеме» делінген хабарламада.

19-26 қыркүйек аралығында ұн 0,6%-ға қымбаттады. Сарапшылар бұған дейін жеті айға жуық бағаның көтерілмегенін, тек бірде  төмендеп, бірде  тұрақты баға ұстанғанын айтады.

Кей сарапшылар бұған Ресейден дәнді дақылдарды экспорттауға тыйым салу әсер еткенін айтады.

«Отандық ұн тартушылар осыдан кейін баға жоғары болған ішкі нарықта астықты сатып алуға мәжбүр болды. Бұл жолы жағдай керісінше. Қазақстан бидай импортына тыйым салды. Бұған оның «жасырын» сатылыммен күрес себеп болды», - дейді сарапшылар.

Ұн бағасының қатты көтерілгенінен нан бағасы 0,2%-ға қымбаттады. Бұл биылғы соңғы 14 аптадағы бағаның алғаш шарықтауы.