Шымкентте спирт зауытының басшысы ұсталды

Қаржы мониторингі агенттігі Шымкенттегі спирт зауытында есепке алынбаған 81 тоннадан астам алкоголь өнімінің заңсыз өндірілгенін анықтады. Бұл спирт суррогат өнімді астыртын жасаумен айналысатын тұлғаларға сатылды.

Бұл туралы ҚМА хабарлайды.

Көлеңкелі экономикаға қарсы күрес аясында этил спиртін сақтау және өткізу ережелерін бұзып, мереке және демалыс күндері алкогольдік өнімдердің заңсыз жөнелтілгені анықталды.

Зауыт басшысы қылмыстық жауапкершіліктен құтылу мақсатында шенеунікке 20 000 АҚШ доллары және ай сайын 1 000 000 теңге көлемінде пара ұсынды.

Сот шешімімен күдікті қамауға алынды. Тергеу жалғасып жатыр.