Шымкентте Руслан Берденовке қастандық бойынша апелляциялық сот басталды

Шымкентте қала әкімінің орынбасары Руслан Берденовке қастандық жасау ісі бойынша апелляциялық сот процесі басталды. Ернар Жиенбайға шыққан үкім не жәбірленушіге, не қорғау тарапына ұнамаған. Екі жақ та істі қайта қарауды талап етті. Процеске Orda.kz тілшісі қатысты.

Алғаш болып Берденовтің адвокаты Жеңіс Тыныбек сөз алды. Ол істі қайта саралауды сұрады. (Бірінші инстанция соты Ернар Жиенбайды адам өлтіруге оқталу бабымен кінәлі деп тапқан).

«Біз Ернар Жиенбайды Қылмыстық кодекстің 99-бабының 2-бөлігінің 2 және 6-тармақтары бойынша (тікелей ниетпен кісі өлтіруге дайындалу) кінәлі деп тануды сұраймыз. Бұрынғы үкім заңсыз шығарылды, оны өзгерту қажет», — деді адвокат Тыныбек.

Сотта сотталғанның әкесі Жиенбай Пірәлиев те сөз сөйледі. Ол кәсіпкер Сырымбек Тау мен болған әңгімесін баяндады.

«Сотта Берденов: «олар кешірім сұрамады» деді. Бұл шындыққа жанаспайды. Оқиғадан кейінгі күні жұбайыммен ауруханаға бардық, бірақ кіргізбеді. Күзет күшейтілген, туыстары ашулы болды. Кейін аурухана ауласында Сырымбек Тау мырзамен жолықтық. Ол «Олимп» тобының адамдарынан күдіктенгенін айтты. Басқалар тапсырыс әкімдіктен түсті деді. Бірақ мұның бәрі жалған болып шықты, біз татуластық. Маған өтініштің мәтінін беріп, жариялауды сұрады. Кейін келінімнен де солай істеуді өтінді. Алайда кешірім береміз деген уәделер орындалмады. Ұлым мұны намысына тиіп, ашу үстінде жасады, ешкімді өлтіру ойында болмаған», — деді ол.

Пірәлиев істі Қылмыстық кодекстің 106-бабы («денсаулыққа қасақана ауыр зиян келтіру») бойынша қайта саралауды және ұлын түрмеге жаппай, бостандықты шектеу жазасын тағайындауды сұрады.

Апелляцияның алғашқы отырысы небары бір сағатқа созылды. Руслан Берденов сотқа келмеді. Іс бойынша келесі тыңдау бүгін жалғасады, онда сотталған Ернар Жиенбайдың өзі сөз сөйлейді.

Еске сала кетейік, биыл көктемде Руслан Берденовке қарулы шабуыл жасалды. Бұл оқиға бойынша айыпталушы Берденовтің бұрынғы қызметкері Ерлан Жиенбай болып отыр.