Шымкентте күдіктіні ұстау кезінде полиция қару қолданды

Шымкентте күдікті жәбірленушіге жеке араздық кезіндегі жанжал салдарынан пышақ салып, әйел алған жарақаттарынан оқиға орнында көз жұмды, деп хабарлайды Orda.kz.

Оқиға туралы полицияға куәгерлер хабар берген. Ұстау кезінде ол қарсылық көрсеткен, қолындағы суық қарумен айналасындағыларға қауіп төндірген.

«Күдікті ұстау барысында  қарсылық көрсетіп, қауіп төндірді. Қоғамдық қауіпсіздікті қамтамасыз ету мақсатында полиция қызметкерлері табельдік қару қолданды. Ер адам медициналық мекемеге жеткізіліп, кейін қамауға алынды»,  деп мәлімдеді полиция департаменті.

Қазіргі уақытта оқиғаның барлық мән-жайын анықтауға бағытталған тергеу амалдары жүргізіліп жатыр.

Еске сала кетейік,  Шымкентте күндіз, адам көп жүретін көшеде тұрғындар қатыгез қылмыстың куәсі болды. Алғашында қарапайым жанжал сияқты көрінген жағдай санаулы минуттардың ішінде жаппай төбелеске, адам ұрлауға және кісі өліміне ұласты. Бұл  жолдағы кездейсоқ жанжал ма, әлде 90-жылдардағыдай бандиттік есеп айырысу ма? Неліктен шабуыл жұрттың көз алдында, ашық түрде жасалды? Оқиға қалай өрбіді? Осы сұрақтардың жауабын Orda.kz журналистері зерттеді.