ШҚО-дағы ауыл әкімі тұрғындарға не үшін балағат сөз айтқанын түсіндірді

Шығыс Қазақстан облысы Зайсан ауданының Шілікті ауылдық округінің әкімі Қуаныш Төлеуханов әлеуметтік желіде тұрғындарға балағат сөз айтқан бейнежазбасына қатысты ауыл жұртшылығынан кешірім сұрады, деп хабарлайды Orda.kz.

Бұған дейін әлеуметтік желіде әкімнің ауыл тұрғындарымен кездесуде даусын көтеріп, үстелді ұрып, бейәдеп сөздер айтқан сәті жайлы жазған едік.

Тарап кеткен бейнежазбадан кейін, шенеунік бейнеүндеу жариялап, өз әрекетін түсіндірді.

«Кеше ауылда қоғамдық тыңдау өтті. Сол кезде бөгде адамдар келіп, оның өтуіне кедергі келтірді. Соның салдарынан тыңдау шамамен бес сағатқа созылды. Сол сәтте мен эмоцияға беріліп, орынсыз сөздер айтып қойдым. Шілікті ауылдық округінің тұрғындарынан кешірім сұраймын», – деді Төлеуханов. 

Сонымен қатар, ол өзі осы ауылда туғанын әрі ел игілігі үшін жұмысын ары қарай жалғастыратынын айтты.

Артынша жергілікті полиция департаменті 36 жастағы әкім ӘҚБтК-ның 434-бабының 1-бөлімі «Қоғамдық орындарда әдепсіз сөз қолдану» бойынша жауапкершілікке тартылғанын мәлімдеді. Оған 20 АЕК (78 640 теңге) мөлшерінде айыппұл салынуы немесе 15 күнге әкімшілік қамаққа алынуы мүмкін.

Сондай-ақ, Төлеухановтан ресми түсініктеме талап етілуп  материалдар мемлекеттік қызмет істері агенттігінің этика кеңесіне жолданды.