ШҚО балабақшасындағы балалар өлім аузынан қалды

Шығыс Қазақстан облысындағы «Дәншік» балабақша балаларының өмірі мен денсаулығына қауіп  төндіретін өрескел заң бұзушылықтар анықталды.

Бұл туралы Шығыс Қазақстан облыстық прокуратурасы хабарлады.

Самар ауданы прокуратурасы балаларға қолжетімді жерде химиялық элементі бар шамдарды сақтаған балабақша қызметкерлері жазаға тартты. Бұдан балалар өліп кетуі мүмкін еді.

«Тексеру барысында құрамында сынап бар 22 шамның балаларға қолжетімді жерде сақталуы, олардың өмірі мен денсаулығына тікелей қауіп төндіргенін көрсетті»,  деп хабарлады прокуратура.

Балабақша әкімшілігі  санитарлық нормаларды қатаң сақтамаған.

«Аудан прокуратурасының қадағалау актісі негізінде қауіпті материалдарды әкету бойынша мамандандырылған ұйыммен шарт жасасып, оларды жою шаралары басталды»,  деп хабарлады прокуратура.

Прокуратура кінәлілерді, соның ішінде мекеме басшысын тәртіптік жауапкершілікке тартқанын хабарлады.