Шерзаттың ісі: Айтбек Амангелдінің адвокаттары қомақты қаржы алғаны рас па?

Шерзат Полаттың өліміне қатысты үкім шықса да, осы істің төңірегіндегі әңгіме толастар емес. Айтбек Амангелдінің адвокаттарының Шерзаттың ісіне қатысты белгілі бір ұйымнан қаражат алғаны анықталды, деп хабарлайды Orda.kz.

Айта кетейік, әу баста, Шерзаттың ісін Айтбек Амангелдінің адвокаттары алып, жарты жылға жуық тергеу ісіне қатысты. Алайда сотқа 10 күн уақыт қалғанда іс Мейірман Шекеевтің қолына өтті. Оған себеп Қаржаубай Нұрымов пен Айтбек Амангелдінің арасындағы түсініспеушілік болды. Шерзаттың әкесі адвокаттардан емес Айтбекпен ары қарай жұмыс істеуден бас тартады. Артынша Амангелдінің адвокаттары істен шектелген соң, Нұрымов Шекеевтің көмегіне жүгініп осы істі заңгерге аманаттайды.

Бастапқыда «Qantar» қоры Айтбек Амангелдімен келісімшартқа отырған екен. Осы орайда Шекеев Айтбек Амангелдінің сұхбатта «ешкімнен бір тиын алмадық» дегені шындыққа жанаспайтынын айтты.

«Иә, мен бұл мәліметті растаймын. Өткен жылдың қазан айынан бастап бізде Амангелдінің адвокатарымен бірге отырған келісімшарт бар. Соған қоса біз олардың Талғарға баруына ыңғайлы болуы үшін жалдаған көліктерінің де ақысын төледік. Сонынмен қатар, Қаржаубай Нұрымовтың отбасына психологиялық көмек берген маманның да ақысын төледік. Адвокаттарға қанша қаражат төленгенін ашық айта алмаймын. Бірақ миллионнан артық сома екені анық», – деді Омаров.

Содан Шекеев «Qantar» қоры директорының орынбасары Мұамедхан Oмаровқа оларға да көмек беруін сұрады. 

«Талдықорғанға барып келуге шыны керек аз қаржат кетпейді. Сондықтан мен «Qantar» қорынан еңбек ақымды төлемей-ақ қойыңыз, тек жол шығынын төлеп беріңіз деп өтініш жасадым. Оны мен еш жасырмай әу баста-ақ айтқан едім»,– деді Шекеев.

Осыған дейін Orda.kz Қаржаубай Нұрымовтың Айтбек Амангелдімен неге араны үзгенін және «төбелеске өзі итермеледі» деген айыптарға нақты жауап бергені жайлы жазды. Сонымен қатар, істің «топтасып кісі өлтіру» емес, «бұзақылық» бабымен қаралып жатқанын сотқа небары 10 күн қалғанда естігенін жазған едік.