Шерзаттың әпкесі Бақыт Рейімованы суицидке итермелеген кім?

Шерзат Болаттың әпкесі Бақыт Рейімова көпірден секіріп, өзіне қол жұмсамақ болғанын мәлімдеді, деп хабарлайды Orda.kz.

Бұл туралы блогер Жан Ахмадиев Instagram парақшасында айтты. Марқұм Шерзаттың әпкесі өз-өзіне қол жұмсауға талпынған. Оның айтуынша, бұған TikTok қолданушысы Бауыржан Әбдірахманов себеп болған.

«Шерзат бауырым өмірден өткеннен кейін Бауыржан Әбдірахманов деген кісі пайда болды. TikTok-та отырып, тиісе бастады. “Қаржаубай андай, Нұрқанат мынандай” деп жалған ақпарат таратты. Сол аралықта Нұрқанатым да өмірден өтті. Оның өліміне осы адам тікелей кінәлі. Неге? Себебі ол сөзбен жаншып, қысым көрсетті. Менің өліміме де дәл осы адам кінәлі. Мені суицидке сол итермелеп тұр», – дейді Бақыт Рейімова өз-өзіне қол жұмсамақ болған видеосында.

Ахмадиевтің айтуынша, осы видео жарияланғаннан кейін Бақыт Алматыдағы Райымбек даңғылындағы көпірлердің бірінен секірмек болған. Алайда сол сәтте полиция қызметкері оны құтқарып қалған.