Шерзат ісі: Дидар Қалиахметтің әйелі несие алғызып, елді тақырға отырғызып жүр ме?

Шерзат Полаттың соты бітіп, үкім шыққанымен оған қатысты істер әлі де басылар емес. Сотталғандардың бірі Дидар Қалиахметтің жары Талғар қаласында оншақты адамға несиеге алғызып, алаяқтықпен айналысып жүр деген шағым халық алдына шықты, деп хабарлайды Orda.kz.

Журналист Руслан Өтепбайдың YouTube арнасында Шерзат ісі бойынша сотталған Дидар Қалиахметтің жары Балауса Еркінқызы талай адамның сеніміне кіріп, үстіне пайызын қосып беремін деп несие алып, артынша төлемей кеткені жайлы ақпарат шықты.

Балауса Еркінқызы 23 жастағы Дарын атты жігіттің сеніміне кіріп, 7 миллион 700 мың теңгеге несие рәсімдеген. Жігіттің оған несие алып берген себебі Еркінқызы алған әр несиеге үстінен пайыз беремін деген екен. Балауса Еркінқызының осыншама адамды несиеге батырып жүргенін ата-енесі білетінін, бірақ жай-жапсарынан хабарсыз екенін айтты. Тіпті Дарын деген жігітке Балауса Еркінқызы өзі қолхат беріп, бейнежазбаға барлығын уақытында төлеймін деп жазып берген екен.

Одан бөлек Еркінқызының аттасы Балауса атты тағы бір қыз оған 2 миллион теңге несие алып берген. Оған үстінен 500 мың теңге беремін деп сенімге кіріп артынан алған несиесін 4 айдан бері төлемей келе жатыр екен.

«Мен бұған дейін де қарызға киім сақан едім. Тіпті аз несиеге де алып берген едім. Сол кездері ол барлығын қарыздарын бөліп-бөліп төлеп жүрген еді. Ол осылайша менің сеніміме кірді. Мен оның Шерзат ісіндегі Дидар Қалиахметтің әйелі екенінен несие алып берген сәтте хабарсыз болдым. Мен оны сот ашық болып жатқан кезде ғана білдім. Балауса Еркінқызынан зардап шеккен жеке өзім білетін оншақты адам бар», – дейді Балауса.

Сонымен қатар, Диадр Қалиахметтің жары ешқандай байланысқа шықпай, ешкіммен сөйлеспей кеткен екен. Қазіргі уақытта Балауса Еркінқызының телкефоны «байланыстан тыс жерде». 

Orda.kz тілшісі Дидар Қалиахметтің адвокаты Гаухар Баймұхановаға хабарласқанда ол кісі бізге «қорғауымызда болған адамның туыстарының іс әрекетіне жауап бермейміз» деп қысқа қайырып жауап қайтарды.