Шардарада ұлы мен келінінен қорлық көрген қария көз жұмды

Түркістан облысында жантүршігерлік жағдай тіркелді. Шардара ауданында туған ұлы мен келінінен зорлық-зомбылық көрген қария 4 қыркүйек күні қайтыс болғаны белгілі болды, деп хабарлайды Orda.kz.

Әлеуметтік желіде тараған мәліметтерге қарағанда, қарт кісінің көршісі бұл оқиғаны жасырын түсіріп алған. Алайда ол дер кезінде құқық қорғау органдарына хабар бермеген. Тек қария өмірден озған соң ғана бейнежазбаны жариялаған.

Оқиғаға байланысты Түркістан облысы полиция департаменті қылмыстық іс қозғағанын мәлімдеді.

«Күдікті қамауға алынып, уақытша ұстау изоляторына жеткізілді. Қазіргі таңда барлық қажетті жедел-тергеу амалдары жүргізіліп жатыр. Нәтижесіне қарай заң аясында шешім қабылданатын болады. ҚР ҚПК-нің 201-бабына сәйкес тергеу мүддесіне қатысты өзге мәліметтер жариялауға жатпайды», деп мәлімдеді ведомство.