Шардара ауданынның бас имамы азаншыны боқтап, садақадан түскен ақшаны қалтасына басып отырған

Шардара ауданындағы мешіттің азаншысы бас имамның сорақы қылықтарын айтып, мүфтияттан көмек сұрады. Бас имам жұма намазын өткізбей, садақадан түскен қаржының бір бөлігін мүфтиятқа жібереміз деп елден ақша жинап отырған, деп хабарлайды Orda.kz.

Әлеуметтік желіде Қонар ата мешітінің азаншысы Жүніс Сартаевтың бейнеүндеуі тарады. Оның айтуынша, ауданның бас имамы Марат Асанов мешіт жұмысына араласпайды және жамағат алдына мүлде шықпайды.

«Мен осы мешіттің азаншысы болып бір жыл сегіз айдан бері жұмыс істеймін. Бас имамды әлі күнге дейін мінберде көрген жоқпын. Жұма намазын да өзі өткізбейді. Жылына екі-үш рет қана уағыз айтқанын білемін. Көбіне мешіттің қасындағы кеңседе телефонын шұқылап отырады», — дейді Сартаев.

Сартаевтың сөзінше, бас имам садақа жәшігіне түскен қаражаттың 30 пайызын мүфтиятқа жіберетінін айтып, коммуналдық төлемдерді жамағаттан жинауды тапсырады екен.

«Ай сайын мешітке келген жарық пен су ақысын жамағаттан жинап төлетеді. Ал жұрт жәшіктегі ақшадан неге төлемейсіңдер деп сұрайды. Сол сұрақты бас имамға қойсам, мені шәкірттерінің көзінше сөкті. Бұл туралы Түркістан облысының бас имамына да айттым, бірақ ешқандай шара қолданылған жоқ», — дейді бас имамның әрекетіне ашынған азаншы.

Сонымен қатар, ол Бас мүфти Наурызбай қажы Тағанұлына ашық үндеу жолдап, мешіт беделіне нұқсан келтіретін және жамағатқа қысым көрсететін имамдарға шара қолдануды сұрады.

ҚМДБ-ның Түркістан облысындағы өкілдері оқиға қатысты мәлімдеме жасады.

«Қазақстан мұсылмандары діни басқармасының тапсырмасына сәйкес, аталған жағдайды әділ әрі объективті түрде қарастыру мақсатында арнайы комиссия құрылып, тексеру жұмыстарын жүргізіп жатыр.
Сонымен қатар, Шардара ауданының бас имамы Марат Асанов қызметінен босату туралы өтініш бергеніне байланысты, 2025 жылдың 6 қазанынан бастап қызметінен босатылды», — деп түсіндірді мүфтият.