Сенат Сұлтанбек Мәкежановты Жоғары аудиторлық палата мүшесі етіп тағайындады

Сенат Сұлтанбек Алмасбекұлы Мәкежановтың Қазақстан Республикасының Жоғары аудиторлық палатасының мүшесі болып тағайындалуын мақұлдады, деп хабарлайды Orda.kz.

Мәкежанов бұған дейін Медеу ауданының әкімі, Алматы қаласы әкімінің орынбасары қызметтерін атқарған. 2020 жылдан бері Алматыдан сайланған Сенат депутаты болып келді.

Ол 1983 жылы Целиноград инженерлік-құрылыс институтын инженер-құрылысшы мамандығы бойынша, 2004 жылы Халықаралық еңбек академиясын тәмамдаған. Еңбек жолын жол шебері, инженер-геодезист, құрылыс компанияларының басшысы ретінде бастаған.

Кейінірек Алматы қалалық комсомол комитетінде, партия ұйымдарында түрлі лауазымдарда қызмет етті. 1990-жылдары коммерциялық салада жұмыс істеп, бірнеше кәсіпорын мен банктерде басшылық қызметтер атқарған.

2000-жылдары мемлекеттік қызметке қайта оралып, Алматы қаласы әкімдігінде түрлі лауазымдарда болды. 2020 жылы Сенат депутаты болып сайланды. Кейбір деректерге қарағанда, оның Сенатқа өтуіне бұрынғы басшысы Бауыржан Байбек ықпал еткен.

Жаңа лауазымында Мәкежанов мемлекеттік қаржылық бақылау саласында жұмыс істемек.

Сонымен қатар сенат Амангелді Исеновтің Қазақстан Республикасының Жоғары аудиторлық палатасының мүшесі болып тағайындалуын мақұлдады.

Исенов Қарағанды металлургия институтын тәмамдаған. Сонымен қатар, Almaty Management University-де MBA дәрежесін алып, Stanford University Graduate School of Business-тің LEAD бағдарламасын аяқтаған.

Ол қаржы саласында 2000 жылдан бері жұмыс істейді. Бұған дейін Қазақстан Республикасы Қаржы министрлігінде, Шағын кәсіпкерлікті дамыту қорында және жеке секторда қызмет атқарған. 2008-2017 жылдары Қаржы министрлігінің түрлі құрылымдарында басшылық қызметтерде болған.

Исенов 2022 жылға дейін Еуразиялық даму банкінің басқарма төрағасының орынбасары болды. 2023 жылдың 20 желтоқсанында «Қазақстанның Даму Банкі» басқарма төрағасының орынбасары болып тағайындалып, несие саясатын ұйымдастыру мен үйлестіруге жауапты болды.

Айта кету керек, «Қазақстанның Даму Банкі» («Бәйтерек» ұлттық басқарушы холдингінің еншілес ұйымы) кезінде тек белгілі бір тұлғаларға арнап қаржыландыру жүргізгені үшін сынға ұшыраған. Бұл банк бұрын экс-президент Нұрсұлтан Назарбаевтың жақтастары мен туыстарына тиесілі жобаларды қаржыландырғаны үшін сынға іліккен. Қасым-Жомарт Тоқаев та бұл банк қызметін қатаң сынға алған еді.