Сәукеле киіп, би билеген бойжеткен жұрттың ашуына тиді

Сәукеле киіп, пилонда би билеген бойжеткен жұрттың ашуына тиді, деп хабарлайды Orda.kz.

Желіде ұлттық киім киіп пилонда билеп, бейнежазба түсірген қыз желі қолданушыларының арасында қызу талқыға түсті. Бейнежазбаны Instagram парақшасында блогер Рустем Баязиев жариялады. Ол Мәдениет министрлігіне жүгініп, мұндай әрекет үшін қылмыстық жауапкершілікке тартуды ұсынды. Блогер бұны «ұлттық рәміздерді қорлау» деп атады.

«Мынау не? Қазақтың ұлттық киімімен билеген стриптиз ба? Мына биді қалай айтады? Ұлттық құндылығымызды қорлағаны үшін қылмыстық іс ашу керек» деп жазды Баязиев.

Бейнежазбаны көрген желі қолданушылары осы көрініске әртүрлі пікір айтты. Біреуі биді қазақтың ұлттық киіміне деген құрметсіздік пен қорлау деп бағаласа, басқасы күрделі спорт түрі деп атады.

«Масқара не мынау? Ұлттық құндылығымызды аяққа таптап болды-ау. Заң бойынша шара қолдану қажет. Ашықтан-ашық қорлау емес пе?» деп жазды желі қолданушысы. 

Бойжеткенді жақтап, өнеріне тамсанғандар да аз емес. 

«Оқы, көзіңді аш, біреуді айыптамас бұрын ізден. Пилондық спорт (ағылш. pole sport) - арнайы снарядтарда-тігінен орнатылған болат тіректерде көрсетілетін гимнастика, акробатика, хореография және актерлік элементтерді біріктіретін күрделі спорттық қызмет түрі» деп жазды бір желі қолданушысы

Еске сала кетсек, бұған дейін қазақтың ұлттық киімін киген блогерге «Хан шатырға» кіруге тыйым салған еді.