Сарандағы сатушы қыздың өлімі: тергеу аяқталды

Саран қаласындағы сатушы қыздың өліміне байланысты қылмыстық іс бойынша тергеу аяқталды, деп хабарлайды Orda.kz.

Бұл туралы Қарағанды облыстық полиция департаментінің баспасөз қызметі мәлім етті.

Тергеу материалдары қылмыстық істер жөніндегі мамандандырылған ауданаралық сотқа жолданды. Тергеу барысында 50 жастағы күдікті дүкен сатушысына ақша үшін шабуыл жасағанын мойындап, кісі өлтіруді әуел бастан жоспарламағанын айтқан. Қазіргі уақытта ол қамауда отыр. Тергеу процесі облыстық полиция департаменті басшылығының ерекше бақылауында болған.

Еске салайық, қайғылы оқиға қаңтар айында болған. Сол күні күдікті Қарағандыдан Саранға таксимен келген. Такси жүргізушісіне уақытша телефонын қалдырып, кейін оны қайтарып алу үшін дүкенді тонамақшы болған. Бірақ күдіктінің айтуынша, сатушыны өлтіру ниеті болмаған. Қарсылық көрсеткен қызды пышақтап кеткен. Кейін күдіктінің Қазақстан азаматы емес екені анықталды.