Республикалық дирижерлер байқауы Нұрғиса Тілендиевтің 100 жылдығына арналады

8–10 қазан күндері Жамбыл атындағы мемлекеттік академиялық филармонияда композитор, дирижер, КСРО мен Қазақстанның халық әртісі, «Халық қаһарманы» мемлекеттік сыйлығының лауреаты Нұрғиса Атабайұлы Тілендиевтің 100 жылдық мерейтойына арналған республикалық дирижерлер байқауы өтеді, деп хабарлайды Orda.kz.

Байқау Қазақстан Республикасының Мәдениет және ақпарат министрлігінің қолдауымен ұйымдастырылып отыр. Оның негізгі мақсаты – отандық дирижерлік мектеп дәстүрін сақтау және дамыту, жаңа таланттарды анықтау, жастарға қолдау көрсету және ұлттық мәдениет беделін халықаралық деңгейде арттыру.

Шығармашылық сынға еліміздің жас таланттары мен музыка университеттерінің 18–35 жас аралығындағы студенттері қатысады. Байқау екі кезеңнен тұрады. Барлық шығармалар Н.Тілендиев атындағы академиялық фольклорлық-этнографиялық «Отырар сазы» оркестрін сүйемелдеуімен орындалады.

Оркестрдің көркемдік жетекшісі әрі бас дирижері, композитордың қызы Дінзухра Тілендиева байқаудың маңыздылығына тоқталып:

«Бұл тек жас дирижерлердің жарысы ғана емес. Әкемнің бай мұрасымен жақынырақ танысып, оның шығармашылығына қанығып, сол серпінді жас буынға жеткізудің ерекше мүмкіндігі», – деді ол. 

Жамбыл атындағы мемлекеттік академиялық филармония директоры Ақан Әбдуалиев байқаудың композитордың мерейтойымен қатар келуінің ерекше мәнін атап өтті:

«Нұрғиса Тілендиевтің 100 жылдық мерейтойы еліміз бойынша кең көлемде аталып өтіп жатыр. Алматыда байқаудың ұйымдастырылуы – символдық мәні бар оқиға. Біз бұл жоба тәжірибе алмасуға үлкен мүмкіндік беріп, жаңа есімдерді анықтайтынына сенеміз», – деді филармония басшысы.

Жеңімпаздарды мәдениет пен өнер саласының танымал қайраткерлерінен құралған қазылар алқасы анықтайды. Лауреаттарға мынадай марапаттар табысталады:

• Гран-при;
• I, II және III орындар;
• арнаулы дипломдар;
• «Нұрғиса Тілендиев шығармаларын үздік орындағаны үшін» жүлдесі бар.

Байқау қорытындысы бойынша жеңімпаздарды марапаттау рәсімі мен гала-концерт 10 қазан күні сағат 19:00-де Жамбыл атындағы мемлекеттік академиялық филармонияның Үлкен залында өтеді.

Еске сала кетсек, Orda.kz тілшісі өнегелі өмірін өнерге арнаған біртуар азаматтың көзін көргендермен сұхбаттасты.