Ресейліктер уәде еткен үш ЖЭО құрылысы кейінге қалды

Қазақстанның үш қаласында – Көкшетау, Семей және Өскеменде 2024 жылға дейін ресейліктер уәде еткен жылу электр станциялары құрылысын бастау мерзімі кейінге шегеріледі, деп хабарлайды ресейлік энергетика саласындағы сауда басылымы «Переток.Ру» 

«Біз құрылыстың айтылған уақытта емес, 2025 жылы басталатынын болжап отырмыз», - деді Петербург халықаралық экономикалық форумы (СПИЭФ) алаңында ресейлік «Интер РАО» корпорациясының бас директоры Сергей Дрегвал. 

Оның айтуынша, жобаларға негізінен ресейлік техниканы пайдалану жоспарлануда.

«Біз келісімшарт бойынша жабдық жеткізушіміз және құрылысты қадағалаймыз, біз мердігер болмаймыз. Біз ресейлік техниканы, оның ішінде УТЗ-ды (Интер РАО-ға тиесілі жабдық - ред) жеткізуге тырысамыз», - деді Дрегвал.

Айта кетейік, бір аптадан сәл астам уақыт бұрын, 28 мамырда үкімет отырысында ҚР Энергетика министрі Алмасадам Сәтқалиев Көкшетауда жылу электр орталығы құрылысын бастау биылғы жылдың жазына жоспарланғанын мәлімдеген болатын. 

Еске салайық, бұған дейін Қазақстан мен Ресей Қазақстан Республикасының Энергетика министрлігі мен Ресей Федерациясы Энергетика министрлігі арасында Көкшетау жылу электр орталығы, Семей жылу электр орталығы және Өскемен жылу электр орталығы құрылыс жобалары бойынша ынтымақтастық туралы өзара түсіністік туралы меморандумға қол қойған болатын.

5 наурызда күтілетін электр қуатының көрсеткіштері жарияланды: Көкшетау – электр қуаты – 240 МВт, т/м – 520 Гкал/сағ, Семей – электр қуаты – 360 МВт, т/м – 1200 Гкал/сағ және Өскемен – э/м – 360 МВт, т/м – 1002 Гкал/сағ.

Жобаны жүзеге асыруға Қазақстанның уәкілетті ұйымдар ретінде «Самұрық-Энерго» АҚ, ал Ресейден «INTER RAO - Export» ЖШС анықталған еді.