Ресейлік әуе базаларына шабуыл жасады деген Тимофеев Астанада жүр ме?

Ресейлік бұқаралық ақпарат құралдарының хабарлауынша, Ресейдің стратегиялық бомбалаушы ұшақтарына шабуыл жасады деген күдікке ілінген украиндық Артём Тимофеев Қазақстанға келді. Ол дрондар ұшырылғаннан төрт күн бұрын Астанаға жол тартқан, деп хабарлайды Orda.kz. 

Артём Тимофеевке Ресей әскери аэродромдарына жасалған ең ауқымды дрон шабуылдарының бірін ұйымдастырды деген айып тағылды. Mash Telegram-арнасының мәліметінше, 37 жастағы Украина тумасы бұл операция басталардан төрт күн бұрын Ресейден кеткен. 28 мамырда ол әйелі Екатеринамен бірге Қазақстан шекарасынан өткен.

Сапар кезінде Екатерина Тимофеева Telegram-арнасында көлік ішінде түскен фотосурет жариялап, «ит, мысықпен бірге Астанаға бара жатырмыз» деп жазған.

Ресейлік басылымдардың мәліметінше, дәл осы Тимофеевке тиесілі жүк көліктерінен 1 маусым күні дрондар ұшырылған. Бұл дрондар Ресей Қорғаныс министрлігі нысандарына шабуыл жасаған. Жүргізушілер тергеушілерге Тимофеевтен тікелей бұйрық келгенін айтқан.

Иркутск облысында Тимофеевке ресми түрде іздеу жарияланды. Ол 1 маусым күні «Белая» аэродромына жасалған шабуылға қатысы бар деп күдікке ілінді. Усть-Кут қаласы әкімдігінің мәліметіне қарасақ, Тимофеев Донецк өңірінің тумасы. Басқа деректерде оның Житомирде туғаны көрсетілген және 2018 жылға дейін Киевте тіркеуде болғаны жайлы ақпарат бар.