Ресейдің әскери ұшақтарын жаруға қатысы бар деген күдікті Астанаға қашып кетті ме?

Ресейлік стратегиялық бомбалаушы ұшақтарды жаруға қатысы бар деген күдікке ілінген украиндық Артём Тимофеев іздеуге жарияланды. Бұған дейін оның жұбайымен бірге Қазақстанға кетуі мүмкін екені айтылған еді, деп хабарлайды Orda.kz.

«Коммерсантъ» басылымының жазуынша, Артём Тимофеев Ресейде федералдық іздеуде жүр. РФ ІІМ деректер базасында Тимофеевтің Украинадағы Житомир қаласында туғаны көрсетілген. Қандай бап бойынша ізделіп жатқаны нақты көрсетілмеген.

Тимофеев «Өрмек» операциясына қатысқан деген күдікке ілінген. Бұл — Ресейдің бес аймағындағы аэродромдарда әскери ұшақтарды дрондар арқылы жою операциясы. 1 маусым күні дрондар ұшып шыққан жүк көліктері дәл осы Житомир тумасына тиесілі болғаны айтылып отыр.

Ресейлік БАҚ-тың хабарлауынша, Артём Тимофеев бірнеше күн бұрын Челябіден әйелімен бірге Астанаға кеткен. Ол Қазақстанда қалды ма, әлде елді тек транзиттік аймақ ретінде пайдаланды ма — әзірге белгісіз. Кремль Тимофеевті іздеу бойынша Қазақстанмен ынтымақтаса ма деген сұраққа нақты жауап берген жоқ.