Ресейді SWIFT-тен ажыратса, Қазақстандағы банктердің жағдайы не болмақ

Ұлттық экономика министрі Әлібек Қуантыров егер Ресей SWIFT жүйесінен ажыратылса, Қазақстан «басқа жол таба алады» деп есептейді.

Министр бұған дейін санкциялар болғанын, бірақ олар негізінен Ресей аумағында тікелей жұмыс істейтін банктерге қатысты екенін атап өтті.

— Екінші жағынан, егер бұл дәл осы Жинақ банкіне әсер етсе және ол Қазақстандағы ең белсенді екінші немесе үшінші тірек болса, онда ағынның бір бөлігі басқа қазақстандық банктерге түседі. Бір-екі банкке байланған жоқпыз. Қазақстан SWIFT-тің белсенді қатысушысы болып табылады және ең жағымсыз сценарийлердің бірі – Ресейдің SWIFT-тен ажыратылуын алсақ, біз де тығырықтан шығудың  басқа жолын таба аламыз деп ойлаймын, - деді Қуантыров.

Бұл ретте ҰЭМ шектеулер Сбербанкке әсер еткеннің өзінде, бұл Қазақстан азаматтарына төленетін әлеуметтік төлемдерге әсер етпейді деп санайды.

Қуантыров мемлекет қазақстандықтарға 10 миллион теңгеге дейінгі депозит сомасына кепілдік беретінін еске салды.

— Депозиттерге кепілдік беру арқылы бұл қаражатты осындай сценарий бойынша қайтаруға болады. Ал жоғарыда айтылған – жеке тұлғалардың тікелей тәуекелдері. Бірақ бұл халықтың әлеуметтік жағынан осал топтарына қатысты  емес, - деп түйіндеді министр.

Украина президенті Владимир Зеленский Еуропаның барлық елдері Ресейді халықаралық банктік төлемдердің SWIFT жүйесінен ажыратуға келісті деп мәлімдеді. Елдің Сыртқы істер министрі Дмитрий Кулеба ресми шешім әлі ресімделмегенін, бірақ шешімді қабылдау және бұл санкцияны жүзеге асыру үшін техникалық дайындық жұмыстары басталып кеткенін нақтылады.

Бұл ретте CNN өз дереккөзіне сілтеме жасап, АҚШ пен ЕО жалпы Ресейді емес, SWIFT-тен жекелеген банктер мен компанияларды ажырату мүмкіндігін қарастырып жатқанын хабарлады.