Прокуратура экс-министр Елжан Біртановтың ісі бойынша жаңа деректерді тексеріп жатыр

2022 жылы сотталған бұрынғы денсаулық сақтау министрі Елжан Біртанов пен оның бұрынғы орынбасары Олжас Әбішев жаңадан ашылған мән-жайларға байланысты қылмыстық істі қайта қарауды талап етті, деп хабарлайды Orda.kz. 

Бұған дейін олар Бас прокуратураға тиісті өтінішпен жүгінген. Әбішевтің айтуынша, әлеуметтік желілерде жарияланған мәліметке сәйкес, сотта олардың кінәсін дәлелдеген жалғыз куәнің айғақтарын жоққа шығаратын ресми құжаттар табылған.

Malim.kz порталының хабарлауынша, Бас прокуратура сотталғандардың өтінішін Астана қаласының прокуратурасына жолдаған.

«Е.Біртанов және О.Әбішевке қатысты қылмыстық іс бойынша сұрауларыңызға байланысты мынаны хабарлаймыз: жаңадан ашылған мән-жайларға байланысты қылмыстық істі қайта қарау туралы Әбішевтің өтініші мәні бойынша қарау және оның уәждерін тексеру үшін Астана қаласының прокуратурасына жолданды» деп жазылған Бас прокуратураның редакцияның ресми сұрауына берген жауабында.