Президент Тоқаев қазақстандықтарды Халық бірлігі күнімен құттықтады

Тоқаев Қазақстан халқын Халық бірлігі күнімен құттықтап, еліміздің барша азаматтарына зор денсаулық пен бақ-береке тіледі, деп хабарлайды Orda.kz Ақорданың баспасөз қызметіне сілтеме жасап.

Қасым-Жомарт Тоқаев Қазақстан халқының бірлігі күнімен құттықтауында халқымыздың қиын-қыстау кезеңдерде әрқашан бірлікте болып, табыс пен жеңіске ұмтылатынын атап өтті. Бұл мереке елдегі тыныштығы мен тұрақтылығы әрі келісімінің символы екеніне тоқталды.

«Біздің бірегей өркениетіміз қазақ жерінде атамекенін тапқан көптеген этностардың мәдениеттерінің, діндері мен дәстүрлерінің үйлесімділігінің арқасында қалыптасты. Мемлекетіміздің барлық азаматтары – Әділ Қазақстанды құруға атсалысқан біртұтас халық. Халқымыздың күші – бірлікте. Сондықтан осы мұраны сақтап, нығайтуға бар күш-жігерімізді салуымыз керек. Бұл мемлекетіміздің әрбір азаматының қасиетті борышы әрі абыройлы міндеті» деп жазды Президент.