Полиция журналист Лұқпан Ахмедьяровты босатты

Астанада полиция журналист Лұқпан Ахмедьяровтан жауап алғаннан кейін оны босатты, деп хабарлайды Orda.kz. 

Кеше, 10 сәуір күні журналист Instagram желісінде тікелей эфирге кірген еді. Сол эфирде ол өзінің үстінен қылмыстық іс қозғалғанын айтып үлгерген.

Астана қалалық полиция департаменті журналистке қатысты сотқа дейінгі тергеу басталғанын мәлімдеді. Қылмыстық іс «көрінеу жалған ақпарат тарату» бабы бойынша тіркелген.

Ахмедьяровтың айтуынша, жауап алу аяқталған жоқ. Ол бүгін де полиция бөліміне барады.

Айта кетейік, Ахмедьяров өзін Батыс Қазақстаннан ер адамдарды Ресейге жұмыс істеуге апарып, кейін оларды Ресей қорғаныс министрлігімен келісімшарт жасауға мәжбүрлеп жатқаны туралы жазғаны үшін ұстады деп топшылайды.